नयाँ योजनाहरु उपभोक्ता समिति मार्फत गरिरहेका छौंः अध्यक्ष चौधरी
२८ पाैष,काठमाडौं । लुम्बिनी प्रदेशको दाङ जिल्लामा पर्नेे लमही नगरपालिकामा ९ वटा वडाहरू रहेका छन् । १२ हजार ४ सय ८२ घरपरिवार वसोवास गर्ने यस नगरपालिकामा कुल जनसंख्या ५८ हजार ८ सय ८४ रहेको छ ।
गत वैशाखको स्थानिय तह निर्वाचनमा नगरपालिकाको वडा नम्बर ३ को वडा अध्यक्षमा मनोज चौधरीले भारी मत ल्याएर निर्वाचित हुनुभयो ।
अघिल्लो कार्यकालमा बाँकी रहेका योजनाहरु सडक निर्माण र ग्राबेल गर्ने कामहरु आफु निर्वाचित भएर आएपछि सम्पन्न गरिसकेको उहाँले बताउनुभयो ।
उहाँले नयाँ योजनाहरु उपभोक्ता समिति मार्फत काम सुरु भएको र बाँकी रहेको योजनाहरु अनुगमन गरेर टोल विकास र उपभोक्ता समितीमार्फत हुने बताउनुभयो ।
वडामा शिक्षा, स्वास्थ्य र कृषि क्षेत्रलाई पहिलो प्राथमिकता दिँदै हाल विकास योजनाका कामहरु तीव्र गतीमा अघि बढिरहेको पनि जानकारी दिनुभएको छ ।
आफु निर्वाचित हुनु भन्दा अगाडि शिक्षा पेशामा आबद्ध भएको र वडाबासीको साथ, सहयोगको कारणले वडामा काम गर्न कुनै गाह्रो नभएको उहाँले बताउनुभयो ।
आफ्नो कार्यकाल भित्र आफ्नो वडालाई सुन्दर वडाको रुपमा विकास गर्ने उहाँले प्रतिबद्धता जनाउनुभएको छ ।
उहाँले जखेरा तालमा सहरी विकास मन्त्रालयको सहयोगमा स्वर्गद्धारी दर्शन देखि केबलकार जोडनको लागि सम्झौता भइसकेको बताउनुभयो ।
लमही नगरपालिकामा मै पर्ने जखेरा ताल दाङ जिल्लाकै एक प्रमुख पर्यटकीय र रमणीय स्थल हो । यस तालमा भित्र र बाहिर गरी जम्मा चार वटा मन्दिर निर्माण गरिएको छ । थारू समुदायको बाहुल्यता रहेकोले यस क्षेत्रमा माघी (माघे सङ्क्रान्ति) र शिवरात्रीमा भव्य मेला समेत लाग्ने गर्दछ् ।
वडा खबरसँगको कुराकानीमा उहाँले भन्नुभयो, “मलाई अमुल्य भोट दिएर वडा अध्यक्षमा जिताउनु हुने सम्पुर्ण जनताले म प्रति विश्वास गर्नु भएको छ , जनताको त्यो विश्वासलाई टुट्न दिनेछैन । वडाको चौतर्फी विकासको र वडाबासीहरुको समस्या र सामाधानमा म सदैब लागि परिरहने छु ।”