चीनमा एक्लै बस्न बाध्य पुरुषको संख्या अहिलेसम्मकै उच्च
काठमाडौं । चीनमा लैङ्गिक असन्तुलनका कारण अविवाहित पुरुषको संख्या बढ्दै गएपछि प्रान्तीय सरकारले समस्याको समाधान खोज्न अनौठो उपायहरू अपनाइरहेका छन्। चिनियाँ प्रान्तीय सरकारले दम्पतीहरूलाई विवाह गर्नका लागि र बिबाह गराउने मध्यकर्ताहरूलाई समेत नगद पुरस्कार र प्रोत्साहनहरू प्रदान गर्न थालेको छ।
चीनका केही प्रान्तहरू जस्तै शान्सी र ग्वाङ्डोङमा स्थानीय सरकारले ३० देखि ४५ वर्ष उमेरका पुरुष र महिलाबीचको विवाहमा मध्यस्या गर्नेलाई ६०० देखि १,००० युआन (अमेरिकी डलर ८४ देखि १४० डलर) पुरस्कार दिने घोषणा गरेको चिनियाँ समाचार साइट द पेपरले जनाएको छ।
सन् २०२० मा गरिएको जनगणना अनुसार चीनमा ७२ करोड २० लाख पुरुष र ६९ करोड महिला रहेका छन्, सन् १९७९–२०१५ मा जन्मिएकाहरूमा लैङ्गिक असन्तुलन सबैभन्दा बढी देखिएको छ। यो अवधिमा चीनम एक सन्तानको नीति लागू थियो। राष्ट्रिय तथ्याङ्क अनुसन्धान ब्यूरो (NBS) को अनुसार २०२१ मा ग्रामीण क्षेत्रमा लिंग अनुपात लगभग १ सय महिलाहरुको लागी १ सय ८ पुरुष थियो। समग्रमा, आज चीनमा ३ करोड भन्दा बढी पुरुषहरू अविवाहित छन्।
छोरालाई प्राथमिकता दिने चलन चीनमा शताब्दीयौंदेखि चलिआएको कारणले बालिकाे पेटमै हत्या तथा बालिकाको परित्याग बढेकाे छ । जसकारण सन् १९८० देखि नै चीनमा लैङिक असन्तुलन बढेको छ। त्यतिखेर पनि प्रत्येक एक सय महिलाहरूको लागि १ सय ८ पुरुष थिए। सन् २००० मा यो असन्तुलन १ सय २० पुरुषमा पुग्यो। केही प्रान्तहरू जस्तै Anhui, Jiangxi र Shanchi मा यो बढेर १ सय ३० पुगेको छ।
केही विश्लेषकहरूले चीनमा अविवाहित पुरुषहरूको बढ्दो संख्यालाई युवा बेरोजगारीको उच्च दरसँग जोड्छन्। साउथ चाइना मर्निङ पोस्टअनुसार आफ्नो परिवार पाल्न गाह्रो भएको युवाहरूले अविवाहित नै रहन रुचाउँछन्। डिसेम्बर सन् २०२३ मा प्रकाशित चीनको राष्ट्रिय तथ्याङ्क अनुसन्धान ब्यूरोको मासिक तथ्याङ्क अनुसार, १६ देखि २४ वर्षका युवाहरूको लागि बेरोजगारी दर १४.९ प्रतिशत रहेको छ।
जीवनयापनको उच्च लागतले युवाहरूलाई असर गरिरहेको छ। बेइजिङ, सांघाई, ग्वाङ्झाउ र चेङ्दु जस्ता महँगो सहरमा जहाँ जीवनयापनको महँगो छ, त्यहाँ धेरै शिक्षित र उच्च तलब पाएका युवाहरूले विवाह र सन्तानलाई स्थगित गरेर एक्लै बस्न रुचाउँछन्। यो प्रवृत्ति विशेष गरी २० देखि ३० वर्ष उमेर समूहका युवाहरूमा प्रचलित रहेको हङकङमा रहेको एउटा अंग्रेजी अखबारले जनाएको छ।