नयाँ दिल्ली । भारतीय सेनाले चीन र पाकिस्तानी सीमा क्षेत्रमा हवाई ब्रिगेडको तैनाथी बढाउने भएको छ । सुरक्षा जोखिमलाई मध्यनजर गर्दै भारतीय सेनाले ती क्षेत्रमा हवाई ब्रिगेडलाई विस्तार गर्न लागेको हो ।
कमाण्ड र कन्ट्रोल प्रणालीलाई थप सुदृढ गर्नका लागि यस्तो निर्णय लिइएको उच्च सैनिक अधिकारीलाई उद्धृत गर्दै भारतीय समाचार संस्था एएनआईले जनाएको छ ।
हरेक हवाई ब्रिगेडमा ५० देखि ६० हेलिकोप्टर तैनाथ हुने गरेका छन् । यस्ता ब्रिगेडमा आक्रमण/निगरानी गर्ने हेलिकोप्टर, बन्दोबस्तीका मध्यम एवम् भारी हेलिकोप्टरका साथै मेडिकल हेलिकोप्टर रहने गर्छ ।
हाल सीमा क्षेत्रमा तीन सैन्य ब्रिगेड तैनाथ रहेको र ब्रिगेड थप गर्ने प्रक्रिया जारी रहेको ती सैन्य अधिकारीले एएनआईलाई बताएका छन् । उनले हाल अपाचे अट्याक हेलिकोप्टरका लागि पाइलट एवम् प्राविधिकहरुको प्रशिक्षण सम्पन्न भएकोसमेत जानकारी दिएका छन् ।
त्यसबाहेक हेरोन एमके २ र हर्मेस ९०० स्टारलाइनर्सले पनि भारतीय सेनाको क्षमता थप विस्तार हुने उनको भनाइ छ । उनले भारतीय सेनामा महिलाहरुको सहभागिता पनि बढ्दै गएको जानकारी दिए ।
Related posts:
२०२४ को लोकसभा चुनावमा सबै रेकर्ड तोडेर भव्य विजय हासिल गर्ने मोदीको दाबी
चीनको बीआरआईले निम्त्यायो व्यापक वातावरणीय जोखिम
चीनसँग डब्लूएचओ प्रमुखले फेरि मागे कोरोना भाइरसको उत्पत्तिबारे जानकारी
डुङ्गा डुब्दा एघार जनाको मृत्यु, बैसट्ठी जनाको जीवितै उद्धार
