सरकारले रोगी र निरोगी खसी-बोका छुट्याउनका लागि चिन्ह लगाउने

२९ असाेज, काठमाडौं । सरकारले दशैंका लागि खसी–बोका र च्याङग्रा परीक्षण गरी चिन्ह लगाउने भएको छ ।

सरकारले खसी-बोका परीक्षण गरी शुद्ध र स्वस्थ्य खसी–बोकाको सिङमा ‘हरियो’ र रोगी खसी–बोकाको सिङमा रातो रङ लगाउने भएको हाे । उपत्यकाका विभिन्न ११ वटा स्थानबाट खसी-बोकाको स्वास्थ्य परीक्षण गर्ने प्रक्रिया सुरु भएको पशु सेवा विभागले जनाएको छ ।

विभागले पशु र मानव स्वास्थ्यलाई दृष्टिगत गर्दै स्वस्थ्य खसी-बोकाको सिङमा ‘हरियो’ र रोगीलाई ‘रातो’ चिह्न लगाउने अभियान सुरु गरिएको जनाएको छ । कलंकी खसी बजार, बल्खु, कालीमाटी माछा बजार, चोभार नाका, चाल्नाखेल, रांगाबजार, टुकुचा खसी बजार र खाद्य संस्थान, लोकन्थली खसीबजार, सल्लाघारी च्याङग्राबजार र बालाजु बाइपास नाकामा परीक्षण थालिएको छ ।

त्यस्तै, लगनखेल, धापाखेल अकाशे धारा र सुकेधारा र चन्द्रागिरी (थानकोट) दाउरा डिपो, दहचोक मूलपानी चौर खसी बजारस्थित होल्डिङ तथा संकलन केन्द्रमा ल्याइएका खसी-बोकाको स्वास्थ्य परीक्षण गर्न थालिएको विभागले जनाएको छ ।