आतंकवादकाे समर्थनमा उत्रियाे चीन

एजेन्सी ।आतंकवादी संगठन जैश-ए-मोहम्मदका प्रमुख मसूद अजहरका भाइ अब्दुल रउफ अजहरलाई भारतले फेरि संयुक्त राष्ट्र सुरक्षा परिषद् (UNSC) मा कालोसूचीमा राख्न माग गरेको छ। तर चीनले यस पटक पनि यसको विरोध गरेको छ ।

छिमेकी देश चीनले रउफ अजहरलाई संयुक्त राष्ट्र सुरक्षा परिषदको १२६७ आईएसआईएल र अलकायदा प्रतिबन्ध सूचीमा समावेश गर्ने भारतको प्रस्तावको विरोध गरेको छ।

यसअघि गत वर्ष अगस्टमा भारत र अमेरिकाले अब्दुल रउफलाई विश्वव्यापी आतंकवादी घोषणा गर्ने प्रस्ताव गरेका थिए । त्यसबेला पनि चीनले भिटो शक्ति प्रयोग गरेर रोकेको थियो। चिनियाँ प्रवक्ताले भनेका थिए, ‘हामीलाई यो कुरा बुझ्न समय चाहिन्छ। जसका कारण यो प्रस्ताव रोकिएको हो।’ तर, उक्त प्रस्तावलाई संयुक्त राष्ट्रसंघीय सुरक्षा परिषदका बाँकी १४ सदस्यको समर्थन थियो।

अमेरिकाले सन् २०१० मा रउफमाथि प्रतिबन्ध लगाएको थियो । उनीमाथि आतंकवादी गतिविधिमा संलग्नता र भारतमा आत्मघाती हमला आयोजना गरेको आरोप छ। त्यसपछि रउफलाई विश्वव्यापी आतंकवादी घोषणा गर्न राष्ट्रसंघमा प्रस्ताव पठाए पनि चीनले पाकिस्तानलाई समर्थन गर्दै हरेक पटक पछि हटेको छ ।

यस वर्षको जनवरीमा लश्कर-ए-तैयबाको राजनीतिक शाखाका प्रमुख र हाफिज सइदका भाइ मक्कीलाई विश्वव्यापी आतंकवादी घोषणा गरिएको थियो। अमेरिका र भारतले मिलेर यो प्रस्ताव पनि पेश गरेका थिए जसमा चीनले सुरुमा आपत्ति जनाए पनि पछि स्वीकृत गरेको थियो । यसपछि संयुक्त राष्ट्र सुरक्षा परिषदको अल कायदा प्रतिबन्ध समितिले सर्वसम्मतिले मक्कीलाई आतंकवादीको सूचीमा समावेश गरेको थियो।

७४ वर्षीय मक्की लस्करमा महत्वपूर्ण भूमिका निर्वाह गर्दै आएका छन् । मक्की भारत र विशेष गरी जम्मू कश्मीरमा हिंसा र हमलाहरू गर्नका लागि योजना बनाउने, आर्थिक सहयोग गर्ने, आतंकवादीहरूलाई भर्ती गर्ने र युवाहरूलाई ब्रेन वाशिंग तथा कट्टरपन्थी याेजना बनाउने कार्यमा संलग्न रहेको छ।

अजहरको जन्म सन् १९७४ मा पाकिस्तानमा भएको थियो । उहाँ मसूदका भाइ हुनुहुन्छ र उहाँको अनुपस्थितिमा जैशसँग सम्बन्धित सबै निर्णय लिनुहुन्छ। अब्दुलले सन् १९९९ मा भारतीय विमान अपहरण गरेका थिए । जसका कारण भारतले मसूद अजहरलाई रिहा गर्नुपरेको थियो । त्यसपछि रउफ भारतको शीर्ष पाँच मोस्ट वान्टेड आतंकवादीको सूचीमा परेका छन्। अजहरले २००७ मा जैश कार्यवाहक कमाण्डरको रूपमा पनि काम गरिसकेका छन्। २००१ मा भारतको जम्मू कश्मीर विधान सभामा हमला, २०१६ पठानकोट आतंकवादी हमला, पुलवामा आतंकवादी हमला जैशद्वारा गरिएको थियो।