लिभरपुलले रेन्जर्सलाई हरायो
एजेन्सी – युइएफए च्याम्पियन्स लिगमा इंग्लिस क्लब लिभरपुलले स्कटिस क्लब रेन्जर्समाथि सहज जित निकालेको छ । घरेलु मैदानमा लिभरपुलले रेन्जर्सलाई २–० ले पराजित गरेको हो ।
लिभरपुलको जितमा ट्रेन्ट एलेक्सान्डर आर्नाेल्ड र मोहम्मद सलाहले गोल गरे । पहिलो र दोस्रो हाफमा समान एक गोल भएको थियो ।
एनफिल्डमा मंगलबार राति भएको खेलको सातौं मिनेटमा ट्रेन्ट एलेक्सान्डर आर्नाेल्डले फ्रिकिकमा गोल गर्दै लिभरपुललाई अग्रता दिलाए । त्यसपछि ५२औं मिनेटमा मोहम्मद सलाहले पेनाल्टीमा गोल गर्दै लिभरपुललाई सहज जित दिलाए ।
यही समूह ‘ए’ को अर्काे खेलमा इटालियन क्लब नेपोलीले डच क्लब आयाक्समाथि ६–१ को पूनरागमन जित निकालेको छ ।
नेपोलीको जितमा जियाकोमो रास्पडोरीले दुई तथा जियोभानी डि लोरेन्जो, पिओटर जिलेन्स्की, भिचा केभारतस्केलिया र जियोभानी सिमिओनले समान एक गोल गरे । आयाक्सका मोहम्मेद कुडुसले एक गोल फर्काए ।
घरेलु टोली आयाक्स ७३औं मिनेटमा १० खेलाडीमा समेटिन पुग्यो । डुसान टाडिक दोहोरो पहेँलो कार्ड खाँदै मैदानबाट बाहिरिए ।
यस नतिजासँगै नेपोली ३ खेलबाट ९ अंक जोडेर शीर्षस्थानमा यथावत रहेको छ । लिभरपुल ६ अंक जोडेर दोस्रो स्थानमा रहँदा आयाक्स ३ अंक जोडेर तेस्रो तथा रेन्जर्स अंकविहीन हुँदै पुछारमा छ ।