पर्यटकको रोजाइमा बङ्गलाचुली भ्युटावर

२५ चैत,देउखुरी । दाङको बङ्गलाचुली गाउँपालिकामा बनाइएको भ्युटावर पछिल्लो समय आन्तरिक पर्यटकको रोजाइमा पर्न थालेको छ । जिल्लाको उक्त विकट ठाउँ भ्युटावरका कारण चिनिन थालेको छ ।

घोराही–१५ की सृजना वली पहिलो पटक बङ्गलाचुली घुम्न पुग्नुभयो । उहाँले भन्नुभयो, “बङ्गलाचुली घुम्न आउँदा मन प्रफुल्लित भयो । घुम्न अन्य जिल्ला जान्छौँ । तर आप्mनै गाउँठाउँका पर्यटकीयस्थललाई प्राथमिकता दिँदैनाँै ।”

तुलसीपुर–१७ की अनिता शर्मा पनि पहिलो पटक बङ्गलाचुली घुम्न आउनुभयो । उहाँले भन्नुभयो, “यहाँ न गर्मी छ न जाडो, ठिक्कको मौसम छ ।” भ्युटावरबाट दाङका साथै छिमेकी जिल्ला प्यूठानका विभिन्न ठाउँका मनोरम दृश्य अवलोकन गर्न सकिन्छ । यहाँसम्म पुग्न सडक कालोपत्र गनुपर्ने शर्मा बताउनुहुन्छ ।

बङ्गलाचुलीमा भ्युटावर, नाचघरलगायत संरचना निर्माणका लागि रु दुई करोड २९ लाख खर्च भएको बङ्गलाचुली गाउँपालिकाका पूर्वअध्यक्ष भक्तबहादुर वलीले जानकारी दिनुभयो ।

प्रदेश सरकारअन्तर्गत जिल्ला डिभिजन वन कार्यालयमार्पmत आर्थिक वर्ष २०७६÷७७ मा रु ५० लाख र आव २०७७÷७८ मा रु २० लाख, पर्यटन बोर्ड भैरहवामार्फत रु पाँच लाख तथा गाउँपालिकाको रु ४५ लाख खर्च भएको छ ।

बङ्गलाचुली उद्यान र भ्युटावरलाई व्यवस्थित गर्दै यसलाई आयआर्जनसँग जोड्ने योजना अघि बढाउन आवश्यक छ । बजेट अभावका कारण आवश्यक संरचना निर्माण गर्न नसकिएको बङ्गलाचुली गाउँपालिकाका अध्यक्ष तुलसीराम पुनको भनाइ छ । “सहरबजारको कोलाहलबाट मुक्त पाउन आन्तरिक पर्यटक यहाँ आउने गरेका छन्”, उहाँले भन्नुभयो ।

स्थानीय तहमा निर्माण गरिएका पर्यटकीय संरचना संरक्षण र व्यवस्थित गर्न सङ्घ र प्रदेश सरकारकको सहयोग आवश्यक रहेको पुन बताउनुहुन्छ ।

बङ्गलाचुली लेकबाट कञ्चनजङ्गा, धौलागिरि, माछापुच्छ«ेलगायतका हिमशृङ्खला देख्न सकिन्छ । चिसो हावापानी, स्वच्छ वातावरण, वरपर देखिने अग्ला पहाडले पर्यटकको मनै लोभ्याउने गर्छ ।

दाङ सदरमुकाम घोराही उपमहानगरपालिकाको ट्राफिक चोकदेखि ३० किलोमिटर दूरीको यात्रा गरेपछि बङ्गलाचुली गाउँपालिका–५ मुर्कुटी बजार पुगिन्छ । मुर्कुटी बजारबाट दुई किलोमिटर कच्ची बाटो पार गरेपछि बङ्गलाचुली लेक अर्थात् बङ्गाचुली भ्युटावर पुग्न सकिन्छ ।