नेपाललाई हङकङले दियो ९४ रनको लक्ष्य

काठमाडौं । एसीसी वुमन्स प्रिमियर कपको पहिलो खेलमा नेपाललाई हङकङले ९४ रनको लक्ष्य दिएको छ ।

मलेसियाको क्वालालाम्पुरस्थित सेलांगुर टर्फ क्लबमा नेपालसँग टस हारेर पहिले ब्याटिङको निम्तो पाएको हङकङले ९३ रन बनाएको हो ।

हङकङले ८ विकेट गुमाएर पूरै २० ओभर खेल्दै ९३ रन बनाएको हो । हङकङकी कप्तान चान का यिंग क्यारीले सर्वाधिक २१ रन बनाइन् ।

मरियम बिबीले १९, यसमिन दसवानीले १५ र ओपनर नताशा माइल्सले ११ रन बनाइन् । अन्य ब्याटरले दोहोरो अंक जोड्न सकेनन् ।

नेपालकी रुविना क्षेत्र र कविता जोशीले समान २/२, पुजा महतो र सीता रानामगरले एक/एक विकेट लिए । अहिले नेपालले जवाफी ब्याटिङ थालेको छ ।