ठक्करबाट स्कुटी चालकको मृत्यु भएपछि बसमा आगजनी
काठमाडाैं । मोरङमा बसले ठक्कर दिएर स्कुटी चालकको मृत्यु भएपछि स्थानीयले बसमा आगजनी गरेका छन्।
उर्लाबारी नगरपालिका– ३ नयाँ मंगलबारेस्थित पूर्व–पश्चिम राजमार्गमा बसले विपरीत दिशाबाट आउँदै गरेको स्कुटरलाई ठक्कर दिँदा स्कुटर चालकको मृत्यु भएपछि स्थानीयले बसमा आगजनी गरेका हुन्।
मोरङ प्रहरीका अनुसार पूर्वी नेपाल यातायतको मे १ ख ३०७३ नम्बर बसले पूर्वबाट पश्चिमतर्फ जाँदै गरेको प्र १–०१–०१३ प २९० नम्बरको स्कुटरलाई दिउँसो २ बजेतिर ठक्कर दिएको थियो। ठक्करबाट स्कुटर चालक झापा कमल गाउँपालिका– २ का ३४ वर्षीय पवन सुबेदीको घटनास्थलमै मृत्यु भएपछि आक्रोशित स्थानीयले बसमा आगजनी गरेका हुन्।
आगजनीबाट बस क्षतिग्रस्त भएको छ। प्रहरीले बसका चालक झापा कनकाई नगरपालिका– ३ बस्ने ३२ वर्षीय टंकप्रसाद सुबेदीलाई नियन्त्रणमा लिएर अनुसन्धान थालेको मोरङ प्रहरी प्रवक्ता डिएसपी रन्जन दाहालले जानकारी दिए।