काठमाडाैं । राष्ट्रिय एकता अभियानले नेपालको आन्तरिक मामिलामा चीन सरकारले हालै गरेको हस्तक्षेपको कडा निन्दा गरेकाे छ।
अभियानले एक प्रेस विज्ञप्ति जारी गर्दै नेपालका कम्युनिस्ट पार्टीहरूलाई एकताका लागि प्रभाव पार्ने र दबाब दिने चीनको प्रयास हाम्रो राष्ट्रको सार्वभौमसत्तामाथिको हनन मात्र होइन, राजनीतिक दलहरूभित्रको लोकतान्त्रिक प्रक्रियाको डरलाग्दो उल्लङ्घन पनि रहेकाे जनाएकाे छ ।
जारी विज्ञप्तिमा भनिएकाे छ,’एक सार्वभौमसत्ता सम्पन्न राष्ट्रको हैसियतमा नेपालका राजनीतिक दलहरू आन्तरिक निर्णय प्रक्रियालगायत आफ्नो राजनीतिक मार्ग र गठबन्धनहरू स्वतन्त्र रूपमा निर्धारण गर्ने अधिकार राख्दछ। आन्तरिक लोकतान्त्रिक विचार-विमर्श र निर्णय गर्ने वातावरण बनाउन राजनीतिक दलका सदस्यहरूबीचको बैठकहरू स्वतन्त्र रूपमा कुनै बाह्य हस्तक्षेपविना सञ्चालन गर्नुपर्छ।’
चिनियाँ कम्युनिष्ट पार्टीका अन्तर्रा्ष्ट्रिय विभागका मन्त्री लिउ जियानचाओ र नेकपा माओवादी केन्द्रका उपाध्यक्ष अग्निप्रसाद सापकोटालगायत नेपालका माओवादी नेताहरुबीच चीनमा हालै भएको भेटले हाम्रो राष्ट्रको सार्वभौमसत्तामाथिको हननप्रति गम्भीर चिन्ता सिर्जना भएकाे अभियानका केन्द्रीय अध्यक्ष विनय यादवले बताए ।
उनले भने,’आन्तरिक रूपमा हुने यस्ता बैठकले राजनीतिक दलको स्वायत्ततामा मात्रै हनन् होइन, नेपालको स्वतन्त्र र लोकतान्त्रिक राजनीतिक परिदृश्यको विकासमा पनि बाधा पु¥याउँछ।’
नेपालको आन्तरिक मामिलामा चीनको हस्तक्षेप र राजनीतिक दलको बैठकमा गरेको अनावश्यक हस्तक्षेपको भर्त्सना गर्न अन्तर्राष्ट्रिय समुदायलाई आग्रह गर्न पनि अभियानले अनुराेध गरेकाे छ ।
विज्ञप्तिमा थप भनिएकाे छ,’बाह्य दबाब वा हेरफेर बिना आफ्नो राजनीतिक भाग्य निर्धारण गर्ने अन्तर्निहित अधिकार नेपालसहित प्रत्येक राष्ट्रसँग छ। हामी चीनलाई नेपालको सार्वभौमसत्ताको सम्मान गर्न र हाम्रा राजनीतिक दलहरूको आन्तरिक मामिलामा थप हस्तक्षेप नगर्न आग्रह गर्दछौं।’
