मकवानपुरमा जीप दुर्घटना हुँदा १३ जना घाइते

७ कार्तिक,काठमाडौं । मकवानपुरमा  मंगलबार बिहान जीप दुर्घटना हुँदा १३ जना घाइते भएका छन्।

मकवानपुरको इन्द्रसरोबर गाउँपालिका-५ मकैबारीस्थित कुलेखानी भएर मातातीर्थ हुँदै काठमाडौं जाने सडकखण्डमा वीरगञ्जबाट काठमाडौं जाँदै गरेको टाटा सुमो जीप मंगलबार बिहान दुर्घटना भएकाे हाे । साेही दुर्घटनामा परी ३ नाबालकसहित १३ जना घाइते भएका छन् ।

जीप सडकबाट करिब २० मिटर तल खोल्सामा खसेको थियो । दुर्घटनामा घाइते हुनेहरुलाई उपचारका लागि काठमाडौं लगिएको जिल्ला प्रहरी कार्यालय मकवानपुरले जनाएकाे छ । घाइतेहरु सबै भारतको छतिसगढका रहेको जनाइएको छ ।

दुर्घटना भएको जीप चालक बारा जिल्ला कलैयाका अनिलकुमार शाह प्रहरी नियन्त्रणमा रहेका छन् ।